Acts 22
1“O ijo was niŋgi ijo abu ti e kamba anjam bei merŋgit quiye.” 2Pol a Hibru anjam na naŋgi degsi minjrnaqa naŋgi kalil torei kiri kiriosib sonab olo endegsi minjrej, 3“E Juda tamo. Ijo qure utru Tarsus. Tarsus a Silisia sawaq di unu. E dia ŋambabonam ijo ai wo abu wo naŋgi na e Jerusalem qureq osi bonabqa e endia tamo kobaqujaem. Kobaqujaosimqa Gamaliel aqa skul kobaq gilem. Gilsim di sonamqa a na gago moma naŋgo dal anjam kalil geregere plaltosiq osorboqnej. Deqa e Qotei aqa kumbra kalil dauryqajqa tulaŋ siŋgilaoqnem. Niŋgi bini Qotei aqa kumbra kalil dauryqajqa siŋgilaeqnub dego kere e dego dauryqajqa tulaŋ siŋgilaoqnem. 4Deqa e na tamo uŋgasari Yesus aqa gam dauryoqneb qaji naŋgi tulaŋ ugeugeinjroqnsim tontnjroqnsim tonto talq di breinjreqnam qaja tamo naŋgi na ñumeqnab moreŋoqneb. 5Niŋgi na Juda tamo kokba ti atra tamo gate a ti naŋgi nenemnjribqa ijo kumbra deqa niŋgi saiŋgwab. Agi e na nami atra tamo gate a endegsi minjem, ‘Ni anjam bei neŋgreŋyosim ebimqa e anjam di Damaskus qureq osi aisiy Juda gate kokba Damaskus qureq di unub qaji naŋgi enjritqa sisiyosib odbibqa e na tamo uŋgasari Yesus qa naŋgo areqalo siŋgilateqnub qaji naŋgi ojeleŋosiy joqsiy bosiy Jerusalem endia tonto talq di breinjrqai.’ E degsim atra tamo gate minjem.Pol a kiersi Kristen tamo brantej deqa anjam saej
6“Deqa e walwelosi aisim Damaskus qure jojomyeqnamqa qanam jige puloŋ siŋgila koba minjal ti laŋ goge dena aisiq ijo ulatamuq di tulaŋ koba riaŋonaqa e uloŋosim mandamq di ŋeiem. Ŋeiesosim kakoro bei laŋ goge dena brantonaq quem. A endegsi merbej, ‘O Sol, ni kiyaqa e ugeugeibeqnum?’ 8Onaqa e na kamba minjem, ‘O Tamo Koba, ni yai?’ Onaqa merbej, ‘E Yesus Nasaret qaji agi ni na ugeugeibeqnum qaji.’ 9Tamo e ombla na walweloqneb qaji naŋgi dego puloŋ di uneb. Ariya anjam Yesus na merbej qaji di naŋgi qusib poinjrosai.10“Onaqa e na olo Yesus minjem, ‘O Tamo Koba, ni e wau kie yqajqa merbqam?’ Onaqa Tamo Koba Yesus na merbej, ‘Ni tigelosim Damaskus qureq aisim dia tamo bei itqam. A na ni wau kie yqam di mermqas.’ 11Puloŋ di tulaŋ koba riaŋosiq ŋam qamotbonaqa deqa e ŋam ambruibonaqa ŋam atqa keresai. Deqa tamo naŋgi e ombla na walweloqneb qaji naŋgi ijo baŋ ojsib e babaŋbsib Damaskus qureq osi aieb.
12“Damaskus qureq dia tamo bei soqnej aqa ñam Ananaias. A Qotei aqa dal anjam dauryo qaji tamo. Juda tamo uŋgasari kalil Damaskus qureq di soqneb qaji naŋgi a qa maroqneb, ‘A tamo bolequja.’ 13Ariya e Damaskus qureq aisim di sonamqa Ananaias na e itbosiqa ijo areq di tigelosiq merbej, ‘O ijo was Sol, ino ŋamdamu olo poimeme.’ Degsi merbonaqa bati qujai deqa ijo ŋamdamu poibonaqa e olo ŋam atsim Ananaias aqa ulatamu unem. 14Onaqa Ananaias na olo merbej, ‘Gago moma naŋgo Qotei a na ni giltmqo. Ni aqa areqalo dauryosim Yesus unimqa a na ni anjam bei mermim quqwajqa deqa ni giltmqo. Yesus agi kumbra tiŋtiŋ yeqnu qaji tamo. 15Deqa ni Yesus aqa anjam mare mare laqnimqa tamo uŋgasari kalil naŋgi quoqnqab. Kumbra kalil ni unoqnqam qaji deqa ti anjam kalil ino dabkala na quoqnqam qaji deqa ti ni na tamo uŋgasari kalil naŋgi sainjroqnimqa quoqnqab. 16Deqa ni tariŋaim. Ni urur tigelosim are bulyosim Yesus aqa ñam qa ino areqalo siŋgilatosim pailye. Yimqa e na ni yansmitqa Qotei na ino une kalil kobotetmqas.’ Ananaias na e anjam degsi merbonaqa e aqa anjam di dauryosim yem.
Qotei na Pol qariŋyonaqa a sawa bei bei tamo naŋgoq gilej. A deqa anjam saej
17“Onaqa bati bei e olo Jerusalem qureq bosimqa atra tal miligiq dia Qotei pailyoqnem. Pailyoqnsimqa bati deqa e ŋeiobilqeiobulosim Yesus unem. Yesus unnamqa merbej, ‘Ni Jerusalem endia ijo anjam maroqnqab di Juda naŋgi na ni quetmoqnqasai. Deqa ni Jerusalem endi saim. Ni urur tigelosim Jerusalem qure uratosim aie.’ 19Onaqa e na Yesus minjem, ‘O Tamo Koba, e kiyaqa Jerusalem uratqai? Juda naŋgi na ijo anjam quetbqab. Naŋgi qalie, nami e are bulyosaisosim bati deqa e naŋgo Qotei tal miligiq giloqnsimqa tamo uŋgasari ni qa naŋgo areqalo siŋgilato qaji naŋgi ojeleŋoqnsim toqoŋ na ñumoqnsim tonto talq di breinjroqnem. Nami Juda naŋgi na ino wau tamo Stiven meniŋ na qaleqnabqa e jojom di tigelosim tamo naŋgi a qaloqneb qaji naŋgo gara jugo taqatesosim endegsi minjroqnem, “Keretosib Stiven qalonub moiqo.” Ijo kumbra di Juda naŋgi qalie. Deqa naŋgi ijo anjam quetbqab.’ 21Onaqa Tamo Koba Yesus na e olo merbej, ‘Ni tigelosim Jerusalem qure uratosim aie. E ni qariŋmitqa ni sawa isaq aisim dia sawa bei bei qaji tamo naŋgi ijo anjam minjroqnqam.’”Pol a na qaja tamo naŋgi minjrej, “E Rom qaji tamo.”
22Pol a anjam degsi maroqnsiq gilsiq a sawa bei bei qaji tamo naŋgoq aiqa marnaqa anjam qujai di Juda naŋgi qusib deqa minjiŋ ani oqetnjrnaqa tulaŋ koba leleŋosib maroqneb, “Pol a qalib moiem. Tamo deqaji mandamq endi olo saiq.” 23Juda naŋgi degsib maroqnsib murqumyoqnsib naŋgo gara jugo piqteleŋosib naŋgo baŋ na wi ramboiyoqnsib breiyeqnab goge oqoqnej. 24Onaqa qaja tamo naŋgo gate koba a Juda naŋgo kumbra di unsiqa aqa qaja tamo naŋgi minjrej, “Niŋgi Pol osib nuŋgo ŋeio tal miligiq osi gilsib bu toqoŋ na kumbaiŋyiye. Kumbaiŋyosib nenemyibqa aqa une kie qa kio tamo uŋgasari naŋgi murqumyoqnsib a qalib moiqajqa mareqnub di a na geregere mergimqa iga quqwom.” 25Onaqa qaja tamo naŋgi na Pol sil na tontosib kumbaiŋyqa laqnabqa a na qaja tamo gate bei jojom di tigelesoqnej qaji di minjej, “E Rom qaji tamo. Deqa niŋgi ijo une geregere qalieosaisosib e laŋa kumbaiŋbqab di kumbra bole kio?”26Onaqa qaja tamo gate dena Pol aqa anjam di qusiqa a qaja tamo naŋgo gate koba aqa areq gilsiqa nenemyej, “Pol a Rom qaji tamo. Deqa ni a kieryqam?” 27Degsi minjnaq qusiqa Pol aqa areq gilsiq minjej, “Ni merbe, ni bole Rom qaji tamo e?” Onaqa Pol na minjej, “Od. E Rom qaji.” 28Degsi minjnaqa gate koba dena olo Pol minjej, “E silali kobaquja waiyonamqa deqa naŋgi na e Rom qaji tamo ateb.” Onaqa Pol na kamba minjej, “E silali waiyosai. Ijo ai wo abu wo naŋgi Rom qaji. Deqa e Rom qaji tamo tiŋtiŋ.” 29Onaqa qaja tamo naŋgi Pol aqa anjam di qusib a kumbaiŋyqa urateb. Pol a marej, “E Rom qaji tamo.” A degsi marej deqa qaja tamo naŋgo gate koba a ulaej. Di kiyaqa? A na aqa qaja tamo naŋgi minjrnaqa Pol sil na tonteb deqa.
Pol a na Juda tamo kokba naŋgi anjam palontosiq minjrej
30Ariya naŋgi sonab nebeej. Une kie qa kio Juda naŋgi na Pol qalsib moiotqa maroqneb di qaja tamo naŋgo gate koba a qalieqa marsiqa Pol osiq sil palontetosiq atra tamo kokba ti Juda tamo bole bole ti naŋgi metnjrnaq bosib koroonabqa Pol osiqa naŋgo ulatamuq di tigeltej.
Copyright information for
BOJ